Heb 5 | KYG | STEP | Goti'a hogote vaya'mo mono hu'a ne'apataya vaya'mo apakae konaga vayapati'mo lekana paino apate'niye. Apakaemo konaga'apimogitefe'mo Goti'mo amigune, hu'a hu'naya ya'mo amige konaga'apimogi hosu kava'apilefe'mo afumo he'a Goti'mo ofalinimo amige hu'a mono ali'ya'mo alisayafe'mo lekana paino apate'niye.

Hebrews 5

1 Goti'a hogote vaya'mo mono hu'a ne'apataya vaya'mo apakae konaga vayapati'mo lekana paino apate'niye. Apakaemo konaga'apimogitefe'mo Goti'mo amigune, hu'a hu'naya ya'mo amige konaga'apimogi hosu kava'apilefe'mo afumo he'a Goti'mo ofalinimo amige hu'a mono ali'ya'mo alisayafe'mo lekana paino apate'niye. 2 Himamu'apimo ohane'niya'mofe'mo afite'a o'age'naya vaya'aitega'e alagepa ka'mo atale'a u'naya vaya'aitega'e'mo vase vase kava'mo afa'a hugae. 3 Himamu'apimo ohane'niya'mofe'mo alu vaya'ai hosu kava'apilefeke'mo afumo he'a ofalinimo o'ami'naya'monanafa apakai'api hosu kava'apile'efe'mo ne'amiye. 4 Mago vaya'mogi apakai'apimo, ani ali'ya'mo afa'a aligune, hu'a osu'nafa Gotike'mo Elonife'mo keya aeno ge hu'niya kava huno keya aeno ge hu'niya vaya'amogige'mo ani ali'ya'mo ne'aliye.

5 Ani kava huno Kalaisi'a hogote vekamo mono huno nelateya vekamo'mo lusi ali'ya'mo alisiyafe'mo agai'a agufamo avalelino ohai'niye. Ha'ao, Goti'a agaefe'mo,

Mafa'ne'nimo mai'nane. Hemenimo ago ali'na kate'nove,
huno huteno 6 mago'e gemo aote mukufi'mo huno'ae'mo,

Melikiseteki'a mono huno ne'apateya vekamo mai'niya kava huka mono huka ne'apatana vekamo mai'neka o'ataleka muki afina'mo ali'ya'mo alige alige huka maigane,
huno ago hu male'niye. 7 Kalaisi'a ma mopafi'mo mai'neno'ae'mo falisiya kavategati'mo agufamo alino katino atesiya Gotifeke'mo alopa gefati'mo keya aeno ge huge avi'ya huge huno aukaya huno nunumu hu'niye. Gotife'mo koli nehuno mono hu'niya'mofe'mo Goti'a ge'amo afi'niye. 8 Agaemo Goti Mafa'ne'amo mai'niya'monanafa ge'amo afiteno akame hisiyafe'mo lusi kava huno agafu ki'niya kayoteti'mo amagino alino aya male'nigeno alagepa huno afi'niye. 9 Goti'a ali'ya'amo alisiyafe'mo avaleno aote ate'nigeno'ae'mo agaemo ge'amo akame nehaya vaya'ai apakufamo alino katino ne'apateya kava'mo aepa vekamo hamale'niye. 10 Hamale'nigeno Goti'a,Melikiseteki'a hogote vekamo mono huno ne'apateya vekamo mai'niya kava huka mai'nane, huno ge hu'niye.

Nute mafa'negana hutapa o'maiyo, huno hu'niya gemae

11 Ani kavafe'mo mago'e gemo lapa paiguna'monanafa lapau mai'mai hutapa ne'maiya'mofe'mo haiya kava huta alita lapaya malegaune. 12 Yatala afina'mo Goti ge'amo ago afi'naya'mofe'mo ali'a apaya ne'malaya vaya'mo maisaya ya'mo hane'niya'monanafa Goti'a ge'amo aepa fai'niya gemo mago'e hu'a ali'a lapaya malesaya kava'mo hane'niye. Lapakaemo lokiya ne'ya'mo afa'a o'netapa nu'ageke'mo nesaya agufa kava'mo hane'niye. 13 Nu'age'mo ne'naya vaya'mogimo nute mafa'negana hu'a ne'mai'apae'mo fatago kavafe'mo ava gemo alagepa hu'a no'afiye. 14 Alopa vaya'mogimo lokiya ne'ya'mo ne'nae. Muki afina'ae afina'ae'mo afime afime ne'aya'mofe'mo alagepa ge'e hosu ge'e'mo alagepa hu'a afa'a ali'a fako hu'a ne'afiye.